“الفنان محمد فاروق” هل شاهدت فيلم “أمير البحار” للفنان محمد هنيدي . بالطبع لفت نظرك الممثل الذي جسد دور حجازي خطيب شقيقة أمير “محمد هنيدي”، والجمل الشهيرة التي قالها في الفيلم” “بلم الكنافة، ونفسي أبقى راجل في بيتي”.
ولعلك سألت نفسك بعد الفيلم عن سبب اختفائه وعن أسمه، أنا مثلا شاهدت الفيلم في السينما وبحثت عنه بعدها فوجدته مات قبل عرض الفيلم من الأساس..
ونرصد لكم في هذا التقرير معلومات عن الفنان محمد فاروق بطل فيلم “أمير البحار”.
– غير معلوم على وجه الدقة تاريخ ميلاد محمد فاروق.
– درس محمد فاروق في مركز اﻹبداع الفني مع المخرج خالد جلال.
– شارك بالتمثيل في عدد من المسرحيات، لكنه عُرف على نطاق واسع من خلال مسرحية (قهوة سادة) لأنها عُرضت تلفزيونيا.
– ظهر محمد فاروق في عدد من الأفلام السينمائية، منها: (حين ميسرة، أدرينالين، أمير البحار)، ويعد الأخير هو أشهر أدواره والمفارقة أنه آخرها.
– في سنة 2008، قدم دور شهير، عندما جسد دور عوض – زوج أخت حسن، في فيلم “المش مهندس حسن”، من بطولة محمد رجب، وإخراج منال الصيفي.
وبلغ رصيده الفني 10 أعمال فنية فقط، عرض منها عملين بعد وفاته هما أدرينالين، وأمير البحار.
– اختاره الفنان محمد هنيدي مع المخرج وائل إحسان من مركز الإبداع الفني بصحبة حسام داغر.
– كتب الفنان حسام داغر صديق الفنان محمد فاروق عبر حسابه بموقع فيس بوك رسالة يتذكر بها صديقه محمد فاروق.
صديق عمر الفنان محمد فاروق
قال داغر: “فاكر أيام مركز الإبداع و بروفاتنا مع أستاذ خالد ومسرحية قهوه سادة، فاكر لما اتصل هنيدي على أستاذ خالد جلال واحنا في الجزائر بنعرض المسرحية وقاله عاوز حسام داغر و محمد فاروق معايا في فيلمي الجديد أمير البحار وطرنا من الفرحة، فاكر أيام تصويرنا الفيلم في الغردقة وفي إسكندرية لما جيتلي أنت و فراج قعدتوا معايا كام يوم لما جدتي ماتت وانا بصور و مرضتش تسيبني لوحدي، فاكر لما كنت تقابلني في جامع السيدة زينب وندعي و نقرا الفاتحة و نطلب التوفيق من ربنا و تطلب البركة منها و تقولي انا و انت اصلا من نفس الحي السيدة زينب و لازم تزورها علطول”.
وأضاف داغر: “فاكر الخروف اللي انت دبحته أنت وثروت ووزعته بعد اول قبض ليك من أمير البحار واقولك طب هاتلك انت حاجه ليك تقولي الفلوس دي بتروح لصحابها، فاكر لما تعبت مننا بليل علي القهوة و رحت المستشفى بس شخصوك غلط ومعرفوش انها جلطه و قلنا لفراج يبات معاك علشان كان اقرب حد ساكن جنب القصر العيني و انت طلبت منه يجيبلك جلابيه تنام بيها و شغلت الراديو علي اذاعه القران الكريم و نمت”.
وفاة الفنان محمد فاروق
وواصل: “فاكر لما أنا وصلت المستشفي الصبح الساعه ٩ وكنت جايبلك الفطار. سندوتشات فول وطعمية سخنة اللي بتحبها و قابلني فراج علي السلم . اول ما شافني و قالي فاروق تعيش انت. وأنا ضربته على وشه فاكره بيهزر وقلتله الحاجات دي مفيهاش هزار. ولقيته انفجر في العياط قدامي و قالي والله العظيم ما بهزر. ورميت الاكل من ايدي و جريت اتاكد من اي حد لقيت حمزه العيلي متماسك. وقالي امسك نفسك ولازم نبلغ أهله. فاكر لما جرينا بيك للمدافن وسط عياط و ذهول الناس وهنيدي كان في الطريق بيحاول يلحقنا. و في الاخر قلتله دفنا خلاص و انا سامع صوت بكاه في التليفون و بيقول النعش طاير مع السلامه يا فاروق”.
وواصل حديثه: “عرضنا الفيلم ساعتها بعد وفاتك و الناس ضحكت من قلبها. و محدش يعرف اننا كنا بنبكي كلنا علشان مكنتش معانا و مشوفتوش. ناس كتير متعرفش انك توفيت اصلا . عارف ليه، لأنك حقيقي عايش وسطنا و دايماً فاكرينك. في فيلم كوكو كانوا بيقولوا ان الميتين في عالم الاموات لما بيتنسوا و يبطلوا الي عايشين يحكوا عنهم. ساعتها بس بيموتوا الموتة الحقيقية علشان كده هنفضل دايما فاكرينك و بحكي عليك. وحشتني يا روقه يا كازامولي يا اطيب خلق الله”.
أقرأ أيضا
